Притисоците од напливот на кинески возила во Европа ќе биде голем предизвик за европската автомобилска индустрија
Во 2026 година, на глобално ниво очекувам намалување на геополитичките тензии и помалку конфликти (пред сè крај на војната во Украина). Ако тоа се случи, можеби во 2026 година ќе сме сведоци на благ и на умерен раст и помрднување од мртва точка, пред сè на германската економија, а со тоа и на економските активности во ЕУ. Глобално американско-кинескиот ривалитет ќе продолжи и ќе придонесе кон дополнително креирање на табори во светот (кој е со кого и зошто). Сметам дека без разлика на сите царински и трговски бариери, долгорочните стратешки потези на кинеската држава во изминативе децении нема да дозволат да дојде до лесна „победа“ и „предавање“ во однос на Американците. На локално поле − успех за сите нас ќе биде реализацијата на сите инфраструктурни проекти во рамките на планираното. Намалување на инфлацијата и поголема продуктивност се неопходни за дополнителен раст и за просперитет. Како компанија, КОСТАЛ Македонија ќе продолжи со растот согласно планот и новите проекти, иако на среден рок притисоците од напливот на кинески возила во Европа ќе биде голем предизвик за европската автомобилска индустрија.
