Општина Штип кореспондира со генералната слика во државава во делот на интервенции потребни за надминување на ограничувањата и отворање нови перспективи. Фактот дека човекот е главен и незаменлив ресурс имплицира непристрасен избор на најкомпетентните, поинаку не може да се очекува зголемување на излезните вредности до граѓаните. Во општа смисла, на системот му недостига интегриран пристап кој ќе гарантира непречен проток на информации и зголемена контрола на процесите, што би се рефлектирало во подобрени услуги по повеќе основи (простор, време и квалитет). Неопходен е влог во транспарентноста на системот, посебно во делот на запазување на суштината на институцијата совет, вклучување на граѓаните во донесување на одлуките и креирањето на општинските буџети. Ерозијата на институции од ваков тип предизвикува индиферентност по клучни прашања, формално носење одлуки, дефицит на иницијативи, недостиг на личен печат врз работите и сл. Потребно е итно надминување на рутината и внесување на визионерска димензија во работењето за да се поврземе со сликата која ја посакуваме наместо онаа во која живуркаме. Искрено очекувам да се обнови интересот кон сето она што го прави Штип типичен и препознатлив град бидејќи подолго време на градот му фали повисока свест за самиот себе.
