– На Илинден, на територијата на Македонија беснеат девет пожари на отворено и шумски пожари, изјави попладнево Стојанче Ангелов, директорот на Центарот за управување со кризи.
Еден од најтешките пожари е на Осоговските планини, којшто беснее на територијата на Општина Пробиштип, во атарот на селото Зеленград. Овој пожар се одвива на исклучително недостапен терен.
– Овој пожар се одвива на исклучително тешко пристапен терен и повеќе денови ни задава главоболка, иако дејствувавме во повеќе наврати во воздухоплови, дејствувавме и од земја. Денеска одлучивме да го нападнеме со концентриран број на хелихоптери. Во текот на утрово, но и во остатокот на денот овде ќе делуваме со осум хелихоптери – 3 македонски (2 армиски и 1 полициски), 1 српски, 2 унгарски, 1 словенечки и 1 чешки, изјави Ангелов.
Од Центарот за управување со кризи (ЦУК) информираат дека денеска до пладне активни се и други пожари на отворено и шумски пожари
Во Општина Демир Хисар гори на Илинска Планина каде се гаси со пет противпожарни авиони – еден на Дирекцијата за заштита и спасување (ДЗС), два германски и два шведски. На тешко пристапниот терен од земја гаснат локални пожарникари со подршка од месно население.
Во Општина Македонски Брод гори кај селата Тажево и Брезница каде огнот развил крак кон резерватот Јасен. Таму е упатен тим од Унгарија составен од 46 лица со специјални теренски возила и опрема, а заедно со нив ќе гаснат и 50 припадници на Армијата и 20 локални пожарникари.
Во Општина Пробиштип има два пожари. Едниот кај селата Зелениград и Јамиште. Таму се дејствува со осум хеликоптери – домашни и од Србија, Унгарија, Словачка и Чешка. На тешко пристапниот планински терен гаснат локални пожарникари со подршка на 30 припадници на Армијата.
Вториот пожар во Општина Пробиштип е во атарот на селото Стрисовци каде од земја гаснат 35 припадници на Армијата, десет локални пожарникари, како и вработени во Рудник „Булмак“, Јавното комунално претпријатие, Дирекцијата за заштита и спасување (ДЗС), како и доброволци од месното население. Од воздух им помага еден хеликоптер од Чешка.
Пожарот во Општина Пласница е кај селото Латово, Македонски Брод. Гори трева, грмушки и нискостеблести растенија. Во гаснењето учествуваат локални пожарникари и тим од Национални Шуми. Пожарот во Општина Пехчево е кај селото Негрево.
Извор и фото МИА
