Македонски Телеком и во првите девет месеци од 2025 година продолжи со одлични резултати. Ова е резултат на успешното работење, фокусот на модернизација и ширење на мрежната инфраструктура и пионерство во имплементација на новите технологии со цел најдобро корисничко искуство.
Раст на приходите од продажба за 1,6%. Приходите од продажба на крајот од првите девет месеци од 2025 година бележат зголемување од 1,6% во споредба со истиот период од претходната година и изнесуваат 9.198 милиони денари. Во рамки на приходите од основниот бизнис се бележи благ раст од 0,6% кај фиксните услуги, и раст од 1,5% во мобилниот сегмент споредено со истиот период од претходната година, додека приходите од системска интеграција бележат значително зголемување од 28,6%.
Зголемување на EBITDA за 6,1%. Оперативната добивка пред камати, оданочување и амортизација (EBITDA) во првите девет месеци од 2025 година изнесува 4.111 милиони денари. Истата е зголемена за 6,1% во споредба со истиот период од претходната година заради намалените оперативни расходи и зголемените приходи од продажба.
EBITDA маргината во првите девет месеци од 2025 година е зголемена за 1,8 процентни поени и изнесува 44,3% во споредба со 42,5% на крајот од истиот период од претходната година.
Раст на нето добивката за 14,9%. Како резултат на движењата на страната на приходите и трошоците како и финансиските приходи и расходи, нето добивката во првите девет месеци од 2025 година година е зголемена за 14,9% во споредба со истиот период од претходната година и изнесува 1.881 милиони денари. Зголемувањето е резултат на намалените оперативни расходи и зголемените приходи од продажба делумно компензирано со намалените финансиски приходи кои произлегуваат од прикажувањето на објективна вредност на финансиските средства (акции во други македонски компании) искажани преку добивката.
